Azərbaycanın Naxçıvan Muxtar Respublikasının Ermənistanla sərhədində itkin düşən ikinci hərbçisi də saxlanılıb.

Azlist.az xəbər verir ki, bu barədə Ermənistan Müdafiə Nazirliyi məlumat yayıb.

Bildirilib ki, həmin əsgər Axundov Hüseyn Əhliman oğlu da Zəngəzur bölgəsindən tutulub.

Qeyd edək ki, Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən Azərbaycan Respublikası Müdafiə Nazirliyinin iki hərbçisi əsgərlər - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu itkin düşüblər.

Onlardan biri - Bəbirov Aqşin Qabil oğlu aprelin 10-da Ermənistanla sərhəddə saxlanılmışdı.

Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası əsgərlərin Ermənistan ərazisində saxlanıldığının ehtimal edildiyi nəzərə alınaraq, onların azad olunmaları ilə bağlı aidiyyəti beynəlxalq təşkilatlara rəsmi müraciət olunduğunu bəyan edib.

Bildirilib ki, məsələ ilə bağlı ictimaiyyətə əlavə məlumat veriləcək.