Azərbaycanın Qarabağ iqtisadi rayonunda məskunlaşmış erməni separatçıları bu gün Xankəndidəki qondarma “parlament”də “prezident seçkiləri” keçiriblər.

Azlist.az Ermənistan KİV-nə istinadən xəbər verir ki, “növbədənkənar iclasda” gizli səsvermə yolu ilə Samvel Şahramanyan qondarma rejimin yeni başçısı seçilib.
 

Verilən məlumata görə, səsvermədə 23 nəfər iştirak edib. Onlardan 22-si Şahramanyanın xeyrinə səs verib.

Qondarma “parlament”in 33 “deputatdan” ibarət olduğu bildirilir.
 

Xatırladaq ki, separatçıların keçmiş başçısı Arayik Arutyunyan sentyabrın 1-də “istefa verib”.

Qeyd edək ki, Azərbaycan Xarici İşlər Nazirliyi hələ dünən diplomatlarla birifinqdə bəyan edib ki, qeyri-qanuni qurumun "prezidentinin" qondarma "seçkiləri" son dərəcə təxribatçı addımdır. Bu, Azərbaycanın suverenliyinin və ərazi bütövlüyünün açıq şəkildə pozulmasına yönəlmiş addımdır.