Böyük və xırda kişilər
Elbəyi Həsənli
20 ilə yaxındır ki, Sürix şəhərində yaşayıram. İsveçrədə əhalinin dördə biri yabançıdır. Dünyanın müxtəlif güşələrindən gəlmiş fərqli mədəniyyətləri təmsil edən insanlar bu ölkədə rahat yaşayırlar.
Məsələn, Sürix İsveçrənin ən varlı şəhəridir. Ölkənin maliyyə paytaxtı sayılır. İsveçrənin paytaxtı Bern şəhərinə Sürix hər il rəsmən maddi dəstək verir. İsveçrədə belədir. Varlı kantonlar kasıb kantonlara maddi dəstək verməyə borcludur...
Düşünün ki, Sürix kimi şəhərdə birisi mənə-türk əsilli müsəlmana demir ki, qaqaş, səni niyə mənim gen yerimi dar eləmisən... Buralarda belə anlayış yoxdur.
Azərbaycan kimi sivilizasiyadan uzaq düşmüş ölkələrdə isə cahillər belə sarsaq söhbətlər edirlər.
Niyə belədir? Çünki bunlar milli düşüncənin daşıyıcısı ola bilməyiblər. Bakılı böyük Məhəmməd Əmin Rəsulzadə idi ki, o taylı-bu taylı Azərbaycan üçün ağlasığmaz işlər gördü. Böyük bir milləti üçrəngli bayrağın altında birləşdirdi. Bakılı Zeynalabdin Tağıyev idi. O, var-dövlətini milli ziyalıların yetişməsi üçün sağa-sola səpələdi. Avropaya oxumağa göndərdiklərindən də soruşmadı ki, sən bakılısan, yoxsa nuxalısan...
Çalışın, böyük kişilərin yolunu gedin. Xırdalara qoşulub xırdalanmayın...
