Seymur Verdizadə

Bildiyiniz kimi, təbii ehtiyatların qanunsuz istismarını araşdıran monitorinq qrupu bu dəfə Xocalıya üz tutub. Onlar Xocalıda sülhməramlı libasına bürünmüş kontingentin qərargahında danışqılar aparıblar. 

Azərbaycanlı mütəxəssisləri bir qrup jurnalist müşayiət edib. Təbii ki, belə də olmalıydı. Ermənilərin rusların dəstəyilə sərvətlərimizi talan etdiyini görmək azdır. Bunu həm də çəkib göstərmək lazımdır. Azərbaycan xalqına yox, ha! Dünyaya! O cümlədən, sülhməramlı kontingentin fəaliyyətinə görə cavabdeh olan, birbaşa məsuliyyət daşıyan Rusiya Müdafiə Nazirliyinin rəhbərliyinə. Ki, rus əsgər və zabitlərinin öz missiyalarını necə yerinə yetirdiklərini görsünlər. Bilsinlər ki, onlar sülhməramlı yox, erməniməramlıdır. Nəyin və yaxud nələrinsə müqabilində Azərbaycanın təbii ehtiyatlarının talan edilməsinə göz yumurlar. Təkcə göz yummurlar, hətta buna şərait yaradırlar.

Amma sülhməramlılar buna imkan vermədi. Xocalıya getmək istəyən azərbaycanlı jurnalistlərin yolunu ciddi-cəhdlə, həyasızlıqla bağladılar. Hansı ki, onlar Qarabağa silah-sursat daşıyan separatçıların yolunu bağlamalıydı. Onlar Xankəndini su yoluna döndərən İran vətəndaşlarının yolunu bağlamalıydı. Onlar Avropadan Qarabağa qanunsuz səfər edən erməni lobbisinin pisniyyətli təmsilçilərinin yolunu bağlamalıydı. Bütün bu qanunsuzluqlar baş verəndə gözlərini bağlamışdılar, amma indi azərbaycanlı jurnalistlərin yolunu bağlayırlar...

Ay İvan, sən kimsən ki, mənə öz torpağımda hərəkət etməyə imkan vermirsən? Bu nə hikkə, bu nə həyasızlıqdır?! Hələ utanmadan jurnalisti təxribata da çəkirsən. Görmürsən ki, onlar Xocalıya əllərində mikrofonla gedirlər. Bilmirsən ki, bu ölkədə mikrofon tutmağı da, silah tutmağı da bacaran oğlanlar var? Bilmirsənsə, hər gün evinə gedib-gəldiyin, arvad-uşağı ilə xoş-beş elədiyin ermənilərdən soruş. Onlar əlisilahlı azərbaycanlıları çox görüblər. İndi imkan verin, qoltuğunda portfel, əlində mikrofon olan azərbaycanlıları da görsünlər. Yoxsa, istəyirsiniz ki, siz Ukraynada qırıldığınız kimi onlar da Qarabağda qırılsın?!

Yolumuza ətdən çəpər çəksən də, baban Pyotru qəbirdən çıxarıb gətirsən də, biz Xocalıya gedəcəyik! Bəlkə də sən buna görməyəcəksən. Bəlkə də o vaxt cəhənnəm olub öz ölkənə gedəcəksən...