Laçın sərhəd məntəqəsi necə işləyəcək? - PROQNOZ
Nazim Cəfərsoy
23 aprel 2023-cü il tarixində saat 12:00-da Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulub.
Əvvəla, bütün sərhəd məntəqələri Azərbaycan qanunvericiliyinə uyğun işləyir. Laçın da bunlardan biri olacaq. Hətta mən deyərdim, Laçın buraxılış məntəqəsi bu qaydalarin ən ciddi tətbiq edildiyi məntəqə olacaq.
Sərhəd məntəqəsi Qarabağdakı erməni sakinlərin keçidi üçün xidmət göstərəcək. Ancaq bu keçidin tənzimlənməsi üçün müvəqqəti qaydalar sisteminin ortaya qoyulacağını təxmin edirəm.
Çox qısa müddətdə Qarabağdakı erməni sakinlərdən Azərbaycan vətəndaşlığını qəbul edilməsi tələb olunacaq. Qəbul edənlər Azərbaycan vətəndaşlarının hüquqlarına və öhdəliklərinə malik olacaqlar.
Azərbaycan xalqına qarşı cinayət işləyənlərə qarşı qanunlarımız tətbiq ediləcək!
Vətəndaş olmaq istəməyənlər ölkədən getmək durumunda qalacaq. Getmək istəyənlərin əmlakını durumlarına görə Ermənistan və ya Azərbaycan dövləti kompensasiya edəcək. (Məsələn, Sovet dövründən burda yaşayanları və onların davamçılarını Azərbaycan, sonradan gələnlərin kompensasiyasını Ermənistan ödəyəcək).
Getmək istəyənlərdən xalqımıza qarşı cinayət işləyənləri isə buraxmaq olmaz, tutub mühakimə etmək lazımdır!
Ermənistan vətəndaşlarının Azərbaycana gəlməsi prosesi də humanitar məqsədli olaraq yuxarıda da qeyd etdiyim müvəqqəti bir keçid prosesi qaydaları ilə tənzimlənəcək, ancaq ardından qarşılıqlı əsasda və beynəlxalq hüquqa görə tənzimlənəcək. Bunun mənası - Azərbaycanın icazəsi olmadan bir nəfər də Ermənistan vətəndaşı və ümumilikdə Rusiya daxil heç bir xarici vətəndaş bölgəyə girə bilməyəcək. Sadəcə müəyyən müddət üçün Qırmızı Xaç və Rusiya sülhməramlıları keçəcək.
Rusiya sülhməramlıları sərhəddə bu prosesin başda zaman -zaman ortaq aparılmasında, sonra monitorinqində və mülki ermənilərin gözlənilən təxribatında vasitəçi rolunu oynayacaq. Zamanla Rusiya əsgərləri bu işdə sadəcə monitorinq ilə məhdudlaşacaqlar.
